OECD bagadallan buorre berošteaddjisearvideami várás rogganindustriija čuozahan áššeoasálaččaiguin
Bagadallan lea reaidu mainna dovdáha ja gieđahallá rogganindustriija doaimma váikkuhusriskkaid ja vahátváraid, go geavaha ulbmillaš berošteaddjisearvideami metodan.
Ulbmil lea váfisit ahte rogganindustriija gávpesearvvit gártejit ja gieđahallet váikkuhusriskkaid ja vahátváraid berošteaddjisearvideami geavahemiin.
Bagadallamis leat sierra juhkosat ráđđádallamiid birra álgoálbmogiiguin, nissoniiguin ja bargiiguin.
Bagadallan čájeha ahte buorre berošteaddjisearvideapmi sáhttá leat ovddolažžan gávpedoibmii dasgo veahkeha:
- oažžut servodagas lobi doaibmat (“sosical license to operate”) ja láhčit diliid rogganindustriija dáláš ja boahttevaš projeavttaide
- árrat gártet rogganguovllu riskkaid ja váraid
- gieđahallat hástalusaid ovdalgo projeakta álggahuvvo, dan sajis go divrras luohttámušhuksenproseassa čađahit maŋŋilgo vahát lea dáhpáhuvvan
- garvit goluid mat gártet go buvttadeapmi šaddá bissehuvvot dahje maŋŋonit riiddu geažil
Bagadallama váldoráva fitnodagaide:
- Berošteaddjisearvideapmi ferte sajáiduhttojuvvot projeaktaplánemii ja beaivválaš doibmii
- Searvideapmi ferte addit čuozahuvvon áššeoasálaččaide duođalaš váikkuhanfámu mearridanproseassaide
- Lea deaŧalaččat fátmmastit joavkkuid geat čuozahuvvojit go sin geat jitnosepmosit čurvot
- Ráđđádallamat leat jotkkolaš proseassa
Earenoamáš deasttat go álgoálbmogiid guovlluide álggaha doaimma:
- OECD válddahusat vurdet ahte fitnodagat ráđđádallet čuozahuvvon joavkkuiguin, nugo álgoálbmogiiguin.
- Álgoálbmogat leat suojehis joavkkut. Riikkaidgaskasaš konvenšuvnnat nannejit dárbbu suodjalit álgoálbmogiid kultuvrra ja árvvuid, nugo sin árbevirolaš doaimmaid.
- Fitnodagat mat álggahit doaimmaid álgoálbmogiid guovlluide, galget earenoamážit váldit vuhtii álgoálbmogiid vuoigatvuođa seailluhit sin árbevirolaš doaimmaid, ja álgoálbmogiiguin galgá ráđđádallojuvvot áššiin main sii leat čuozahuvvon.
- Berošteaddjisearvideami ulbmil berre leat oažžut čuozahuvvon áššeoasálaččaid eaktodáhtolaš ja diđolaš mieđiheami (dajahus FPIC), ja maiddái ovdalgo ohcandoaimmat álggahuvvojit. Šiehtadusat ja čoahkkimat berrejit duođaštuvvot ja dieđut berrejit juhkkojuvvot dakkár gillii maid áššeoasálaččat ipmirdit. Berre šihttojuvvot mo čuozahuvvon áššeoasálaččain galget leat doarvái veahkkevárit oassálastit šiehtadallamiidda, buhtadit oassálastima goluid ja ovdamearkan bálkáhit olgguldas diliid láhčči.
- Fitnodagat berrejit garvit dahje uhcidit vahátváikkuhusaid, ja ráhkadit šiehtadusaid mo vahátváikkuhusat sáhttet váiduduvvot, ovdamearkan buhtadasa bokte.
Áššáiguoskevaš liŋkkat
- Olles bagadallan: OECD Due Diligence Guidance for Meaningful Stakeholder Engagement in the Extractive Sector (eŋgelasgillii) (dárogillii) (sámegillii)
- Diehtogihpa bagadallama birra (eŋgelasgillii)
- OECD:a veahkkevárresiidu bagadallama birra (eŋgelasgillii)